5 a viz Gouere 2004, niv. 20

Vakañsoù Bremaik

Setu erru an hañv, hag ur prantad diskuizh evit lod. Kinniget ez eus bet deoc'h gant skipailh Bremaik ur rummad pennadoù a c'hellot lenn hag adlenn p’ho po c'hoant e-kerzh an daou viz ehan.
Distreiñ a raio Bremaik a-benn al Lun 30 a viz Eost. Hañvezh plijus deoc'h holl !

Beuzit pe neuiit

E-kerzh an hañv 2003 e oa bet gwelet war aodoù Bro-C’hall gouennoù eus an trovanoù e-giz an delfin "Electre". An douristed-se a oa bet sachet davedomp gant hon dourioù tommoc’h (3°C pe 4°C tommoc’h evit boaz).
Siwazh e vez drastus seurt tommder peurvuiañ. Se zo kaoz e oa marvet kalzik a gokez ha rigadell e kreisteiz Breizh abalamour d’an temperadur. Gouzañv a ra ar gouennoù-se diwar bezañ pesketaet  re c’hoazh. Ouzhpenn-se e oa bet ur seurt mikrobezhin marvel o tiorren abalamour d’an tommder ha d’ar re a nitrat (un tamm jamon ‘po c’hoazh ?...). An disoc’h : rouzenned, yared-mor, kizhier-rous ha draeneged marvet a vil vern. Tapet e oa bet an douristed ivez er Mor-Bihan : ur bern morgaoul bihan ha skaot (0,5 betek 3mm) a oa eno abalamour d’an tommder.
Neuze kit da neuial e Breizh a-raok ma erruo barrakuda pe rinkined eus an trovanoù !

Nukleel, trawalc’h a arguzennoù toull

Difennet e vez implij an nukleel gant al lobby nukleel gant arguzennoù a
seblant reizh er penn-kentañ met a zo toull e gwirionez.
Da skouer e vefe marc’hatmat an energiezh nukleel. N’eo gwir nemet ma ne vez ket dalc’het kont eus koust an enklaskoù hag an diorren ha koust al lastez. E gwirionez eo gwall heñvel priz an an tredan nukleel ouzh priz an tredan dre avel.
Dizalc’h e vefe ar vro e-keñver energiezh gant an nukleel. Evit lâret se eo ret disoñjal e vez tennet an uraniom a zo diazez an energiezh nukleel eus kevandirioù ha broioù all (Kanada, Aostralia, Nijer...). Gant an nukleel e stourmer ouzh an efed ti-gwer. Talvezout a ra an nukleel 6,5% eus an energiezh produet er bed. Met tachenn an dezougen, a brodu ar muiañ a gaz efed ti-gwer, ne ra ket gant an nukleel. Neuze n’eus nemet ma vefe kirri-samm atomek e c’hallfe bezañ an nukleel un diskoulm d’an efed ti-gwer!
Ha petra ‘vo graet gant al lastez?...

Kement ha goût hiroc’h : www.sortirdunucleaire.org

Diskouezadeg Jean-Luc Moerman

La Criée
Roazhon
betek ar c’hentañ a viz Eost 2004

Jean-Luc Noerman zo ganet e 1967 e Brussels, yaouank-tre eo enta met savet en deus ur bern a oberennoù a bep seurt. A-barzh oberennoù Jean-Luc Moerman eo klasket kevrin don al livioù dre oberennoù livet, peget levezonet get pep a emsav livañ an arz a-vremañ èl ar grafitioù, arz fraktalisted dre an urzhiataerezh. Ur gwir souezhadenn eo evit an daoulagad hag ar spered o deus poan da gompren ar pezh a welont gwezhadoù, ur souezhadenn vat èl-rezon. Ur wezh arall eo roet da welet arz a-vremañ da vat el lec’h Criée a Roazhon. Ha pa weler penaos e vez gwelet al livañ e bedig an arz a-vremañ e vuzulier
pegen talvoudus eo.
Titouroù : www.criee.org

Arz er chapelioù

Ag an 13 a viz Gouere d’an 12 a viz Eost 2004

El bep blez dibaoe 1991 e vez kinniget diskouezadegoù arz a-vremañ a-barzh chapelioù Bro Pondi. Er blez-mañ, Guy Le Meau hag Herri Barrière a zo an daou arzour pedet a-enor hag 15 arzour arall a ziskouezay o oberennoù.
Kempouezet eo mat etre arzourion a ginnig oberennoù staliet ha livourion. Pep hini a choaz unan ag ar 5 hent gweladenniñ a zo kinniget. Emañ ret mont get e garr-tan peogwir e ya ar sellerion ag ul lec’h d’egile.
Bourrus eo ar mesklaj etre glad hengounel hor bro a zegas gweladennerion a-bep seurt, get tud a vourr an arz a-vremañ ha re arall a za da welet ar chapelioù kentoc’h.

www.artchapelles.com

Diskouezadegoù arz a-vremañ e Breizh e-pad an hañv

Evit ar re ne faot ket dezhe c’hoari krampouezh àr ar jibl a-hed an deiz e-pad ar vakañsoù eh eus un nebeud diskouezadegoù da welet e Breizh e-pad an hañv.
Gellet a reer pourmen e-touez oberennoù kizellet e Ruvenieg/Réminiac men eh eus degemeret un 20 a gizellerion er blez-mañ, mont da bourmen e-touez oberennoù a-bep seurt e Pont-Skorf pe mont ha dont e chapelioù ar C’hap evit dizoleiñ labour 8 arzour a-vremañ o deus labouret diàr tem „al lec’h hag an dud“.

Hentoù kizelliñ Ruvenieg
Titouroù : 02 97 93 22 83

L’art Chemin faisant e Pont-Skorf
Titouroù 02 97 32 42 13

Arz er C’hap
Titouroù 02 98 75 01 17

Mell-droad

Piv en dije gellet lavaret e oa Gres da vezañ kampion Europa 2004 miz zo ? Den ebet, nemet ar c’hoarierien c’hresian sur a-walc’h. Skipailhoù Portugal, Bro-C’hall, Tchekia ha Bro-Spagn, int, o do soñj e-pad pell eus ar skipailh souezhus-se.

Rekipe Gres evit gounit a-hed ar c’hampionad a vo bet difenn start ha chom hep koll kalon gwech ebet. Dre zegouezh e vo bet ar memes skipailhoù o c’hoari er match digoradur hag er match gourfenn (2-1 evit Gres a-enep Portugal hag 1-0 atav evit Gres). Ur flac’had neuze evit an holl skipailhoù bras kannet gant 11 doue nevez ur bobl en he fezh.

Marc’hhouarnerezh

D’an 2 a viz Gouere e oa kroget Tro Bro-C’hall. Evit ar 101vet gwech e tremeno ar rederien dre Vreizh d’ar Sadorn 10 (Kastell-Briant/Sant-Brieg) ha d’ar Sul 11 a viz Gouere (Lambal/Kemper). Unan eus an devezhioù pouezus all a vo an 21 a viz Gouere evit ar redadeg a-benn d’an eur hiniennel en Alpoù Huez. D’an deiz-se marteze e vo c’hoariet un tamm mat eus an dro. Evit a sell ouzh ar rederien, Lance Armstrong a glasko gounit Tro Bro-C’hall evit ar 6vet gwech ha pa vefe kevezerezh kreñv er bloaz-mañ. David Hamilton ha Jan Ulrich a seblant prest evit ober ur redadeg vrav. Met gwelet e vo se e Pariz d’ar 25 a viz Gouere…

C’hoarioù olimpek

P’emañ ar flammenn oc’h ober tro ar bed emañ ar c’hoarioù olimpek oc’h erruout buanoc’h-buanañ. Re vuan marteze evit Aten, ar gêr aozerez. Ha gwir eo ez eus peadra d’en em c’houlenn hag-eñ e vo echu tout ar savadurioù e koulz. Gouzout a reer dija ne vo toenn ebet d’ar poull-neuiñ hag ar savadurioù olimpek n’eus ket un tres gwall vrav dezho. Netra da welet neuze gant c’hoarioù Sidney… Evit gounit avat n’eus ket ezhomm eus ar binvioù gwellañ. Trawalc’h gant ar c’hoant hag ar youl. Se zo d’an nebeutañ ar pezh o deus diskouezet Gresianed zo n’eus ket pell…

Saint Ange

Da heul ur gwallzarvoud eo bet divizet goullonderiñ ti-emzivaded Saint Ange. Erruout a ra ur vatezh yaouank, Anna (Virginie Ledoyen), da zilouzañ al lec’h m’emañ o chom eno c’hoazh nemet un hanter-follez hag ar geginerez kozh. A-raok pell e krog ar plac’h da glevet traoù…
Emañ Pascal Laugier eus memes familh ha Nicolas Boukhrief ("Le convoyeur", s.o. niverennoù kozh Bremaik) : hini ar gazetenn Starfix. Hag e gwirionez e vez savet gant an eil ha gant egile "filmoù-o-seurt" (films de genre) sevenet kaer. Aergelc’h stenn ha skeudennoù brav "Saint Ange" a gaso aon d’an arvestourien moarvat, met ne viro ket outo a verzout elfennoù digenstag ar senario. O kuitaat ar sal e soñjo dezho : "Petra an diaoul a gont an istor-mañ ?". Danvez ur ratozh a zo er film koulskoude, met ur rakskeudenn eo nemetken. Kentoc’h e vo roet d’ar filmgarourien c’hoant gwelet en-dro "The others" gant Amenabar pe "Dark water" gant Nakata.

Skrammoù an hañv

Goude un abadenn rouzañ e plijo deoc’h mont da zistanañ e disheol ar salioù teñval moarvat. Setu amañ da heul ur rakdibab (ha rakvarnioù) war ar filmoù o tont…

9/06 - Illumination – Tremen kollet eo e benn gant Ildud a zo o chom en Oriant. Kouezhañ a ra e karantez gant ur glañvdiourez… Talvoudus a-walc’h eo film kentañ Pascale Breton hervez kont. A-hend-all, brezhoneger eo ar penn c’hoarier, Clet Beyer, a labour ingal gant Dizale.

30/06 - Dawn of the dead (L’Armée des Morts) – Setu eil doare ur film spont brudet mat a oa bet sevenet evit ar wech kentañ e 1979. Plijet oc’h pa vez an Anaon o c’hoari las ?…
http://www.dawnofthedeadmovie.net/

7/07 - The Stepford Wives (Et l'homme créa la femme) – Ur film gant Nicole Kidman sevenet gant Frank Oz. Peadra da vont d’e welet gant fiziañs ?
http://www.stepfordwivesmovie.com/

7/07 – Fahrenheit 9/11 – Hollvrudet eo dija ar film savet a-enep George W. Bush o vezañ en deus kaset Palmezenn Aour ar Film Gwellañ e Festival Cannes 2004 da vMichael Moore. Hag un teulfilm eo ? Ur flemmfilm a lavarfen kentoc’h.
http://www.fahrenheit911.com/

28/07 – I, Robot – Ur film diarbennerezh savet diwar un danevell gant Asimov eo. En dazont tost e vez implijet an ardivinkoù e pep lec’h ; unan anezho a zo lakaet an diskred warnañ gant un inspektour o kas an enklask war un afer muntr…
http://www.irobotmovie.com/

4/08 - King Arthur (Le Roi Arthur) – Kinniget evel darvoud sinema an hañv, setu "ar gwir istor etre mojenn ha gwirvoud" ( ! ). Ar pep gwashañ zo da c’hortoz am eus aon.
http://kingarthur.movies.go.com/

11/08 – The whole ten yards (Mon voisin le tueur 2) – Farsus a-walc’h e oa ar film kentañ ma oa ur gwaz touellet o tizoleiñ micher divoutin e amezeg. Gant ma vo ken yac’h all an heuliadenn-mañ.
http://thewholetenyards.warnerbros.com/

18/08 – The Statement (Crime Contre L'humanité) – Kondaonet eo bet Pierre Bossard (Michael Caine), kenlabourer kozh eus renadur Vichy, evit bezañ kiriek eus marv juzevien. Polis Bro-C’hall a ro skoaz dezhañ evit chom dieub avat.

18/08 - The Village (Le Village) – Un emdroadur a zo gant filmoù Hollywood M. Night Shyamalan, met war an tu fall : an hini kentañ ("The 6th sense") a oa mat, an eil ("Unbreakable") a oa kentoc’h mat, an trede ("Signs") a oa nul. Ha kadarnaet e vo an emdroadur-se gant e bevare film?
http://thevillage.movies.go.com/

25/08 - Exils – Priz ar seveniñ e Festival Cannes 2004 a zo aet gant Tony Gatlif evit ar film-mañ. Romain Duris a gemer perzh e-barzh ar jeu c’hoazh. Trawalc’h eo da reiñ c’hoant mont d’e welet, neketa ?

… Ha na zisoñjit ket Gouel ar Filmoù Douarnenez. Ar 27vet dalc’h-mañ a vo gouestlet da vroioù Belgia eus ar 17 d’ar 24 a viz Eost.
Kement ha gouzout hiroc’h : http://www.kerys.com/festival/Fest.htm

Bed an Jazz e Naoned

18vet Emgavioù an Erdre a vo aozet e Naoned eus an 29 d’an 31 a viz Eost. Un doare da ginnig arzourien Jazz eus ar bed a-bezh asambles gant bed ar bageal en Europa.
Gant ur paeron a-feson, Didier Lockwood, hag a gemero perzh er gouel o kejañ gant ar selaouerien hag o kinnig e abadenn nevez Globe-Trotter, d’an 29 a viz Eost. En holl e vo 50 abadenn evit netra war leurennoù staliet a-hed ar stêr war tri c’hilometrad kae.
An tu d’ober tro ar bed o tremen dre Afrika, Bro Island, ar Stadoù-Unanet, pe c’hoazh Korea. Ha da zizoloeiñ liested an Jazz gant doareoù ken disheñvel ha Swing manouch, Ethno elektro jazz pe Gospel. Ouzhpenn an abadennoù e vo aozet emgavioù tro-dro da raktresoù sevenadurel.
En o zouez ur gaozeadenn diwar-benn Michel Petrucciani hag ar piano en jazz, gant Tony Petrucciani, tad an arzour aet da anaon. Ar sonerien yaouank o do o flas ivez gant ur genstrivadeg Blues: ar 6 strollad aet ar maout ganto a c’hoario war unan eus leurennoù bras ar gouel.

Sonic Youth – Sonic Nurse

embannet gant Geffen

Daou vloaz goude “Murray Street” e tistro Sonic Youth gant ur bladenn nevez. Tost 50 vloaz eo an holl sonerien. Ha neuze ? Pa glever e pep lec’h emañ underground New York o virviñ, e ranker anzav emañ Sonic Youth pell dirak ar strolladoù all. Gant ton kentañ ar bladenn (Pattern Recognition) e adkaver diouzhtu doare ar strollad : sonioù ar gitaroù o tiorren dre wiskadoù trouzus ha liesseurt gant  kan Kim Gordon war-benn. Memestra evit pezh a sell ouzh an tonioù kanet gant Thurston Moore (New Hampshire pe Peace Attack). Ar re o deus internet a c’hallo ivez lakaat ar bladenn e-barzh o urzhiataer ha profitañ eus daou video : Unwritten ha Peace Attack. Ur bern traoù all a zo ivez war al lec’hienn.

www.sonicyouth.com

Prosez an Amoko, gant Alfoñs Arzel

Evit ar re n’int ket kendrec’het c’hoazh ez eus eus pobl Breizh, setu ul levr da lenn diouzhtu ! Kontañ a ra istor ar prosez graet gant ar Vretoned d’an Amoko Cadiz goude lanv du spontus 1978 war aodoù Bro-Leon. Kontet eo ouzhpenn-se gant unan eus penn-tudennoù an istor-se, Alfoñs Arzel, maer Gwitalmeze. Eñ a oa e penn ar Sindikad Kemmesk o vodañ ar Vretoned. Istor 20 vloaz stourm a gaver el levr-se, stourm a welas trec’h ur bobl war ur gevredigezh ramzel kevalaour, ha kement-se dirak lezioù-barn ar Stadoù-Unanet. Ur frazenn evit diverrañ al levr : "Ne ouient ket e oa dibosupl, setu m’o deus en graet !"
Arzel (Alphonse), Le procès de l’Amoco Cadiz, Rennes, Éditions Ouest-France, 2004.

Kement ha gouzout hiroc'h :
www.littoral-coastlines.com
http://www.littoral-coastlines.com/
http://www.mairie-brest.fr/colloque-amoco/

Dilhad : Bec’h d’ar bleunioù !

Ha pa vefent bihan pe vras, met bras kentoc’h, e weler bleunioù ouzh kalz a bezhioù-dilhad : saeoù, rochedoù, sandalennoù… Da zibab zo ! Grit ho mad eus an distaolioù evit splujañ e-barzh ar mor a zanvez disheñvel a c’heller kavout. Diouzh an deiz e c’heller choaz da wiskañ ur pezh-dilhad bleunioù outañ, gant pezhioù all furoc’h, plaen o liv. Diouzh an noz e c’heller meskañ ar stiloù hag ar bleunioù evit degas efedoù dibaroc’h ha hardisoc’h.
Evit a sell ouzh an dilhad-kouronkañ e vez re vrav bleunioù outo ivez. Met, pa skrivan se, kavet hoc’h eus ho hini emichañs ! Neuze, bec’h d’ar vakañsoù, hag emgav e miz Gwengolo, rouzet ha diskuizh. Vakañsoù mat !

Kinklañ : Liorzh an Ael

Ar stal-se lec’hiet e straed Strasbourg en Naoned zo gwall heñvel ouzh ur voestad madigoù roz ! Pa’z eer tre er stal vihan-se, plijus-tre, e vezer souezhet gant an niver a draoù a c’hell bezañ dalc’het e-barzh ken nebeud a blas. Leun a listri brav-tre zo, gwerennoù dreist-holl, livet gant an dorn.
Livioù tener ha tresadennoù simpl ha skañv a ya d’ober stil Valérie, an
arzourez a sav anezho. Eno e c’heller kavout a bep seurt produioù plijus estreget ar listri evit kinklañ an ti : kartennoù, sternoù evit al luc’hskeudennoù, boestoù moutik ha traoù bihan all. Gallout a reer menegiñ ivez e c’heller kavout eno ezañs GOA, reoù blazioù dibar dezho : bambouz / te, kiwi / barlen… Un drugar.

Le Jardin de l’Ange, 21 straed  Strasbourg e Naoned.
Pgz : 02 51 72 28 23

Kig-yar gant soubil blue cheese

Fardañ: 20 mn,  Hiliennañ: 30 mn, Poazhañ: 30 mn

Danvez (evit 4 den) : 4 morzhed uhel kig-yar – 2 glosennad kignen – 2
benn-ognon – 1 domatezenn sec’h en eoul – 1 penn-sitroñs – 4 loiad vras a fourmaj Roquefort – 4 loiad vras a zienn tev – 4 loaiad vras a eoul – holen – pebr.

Strilhit an eoul diwar an domatezenn, ha troc’hit anezhi e diñsoù bihan-tre. Miñsit ar c’hlosennadoù kignen. Meskit ar c’hignen, an domatezenn, chug ar sitroñs, 3 loaiad a eoul, an holen hag ar pebr. Flañchit kroc’henn ar c’hig-yar en un doare skañv. Troit ar morzhedoù-uhel kig-yar en hilienn. Lakait 30 mn er yenerez. Flastrit ar fourmaj Roquefort gant ur fourchetez, ouzhpennit an dienn hag ar pebr. Tommit ar forn da 210 derez / t. 7. Strilhit an tammoù kig-yar. Lakait anezho en ur plad bras bet eoulet, ha poazhit e-pad  20 mn. Troit an tammoù-kig alies, betek ma vefent melenet. Kinnigit ar c’hig gant ognon skejennet. Ouzhpennit an dienn Roquefort. Servijit gant avaloù-douar poazhet er forn, pe riz.

Sivi glec’hiet er muscat

Danvez : 500 g a sivi – 100 g a sukr – 10 kl a vuscat – pluskennigoù rasklet - 1 orañjezenn – chug 1 orañjezenn – 1 meudad poultrenn kanell – dienn-skorn blaz ar sivi dezhañ.

Riñsit ar sivi dindan an dour, tennit o lostigoù diwarno ha troc’hit anezho a dammoù. Bannit anezho en ur besel. Ouzhpennit 50 g a sukr, 10 kl a vuscat, pluskennigoù rasket ha chug an orañjezenn. Meskit mat, goloit gant ur film plastik. Laoskit da c’hlec’hiañ e-pad div eur er yenerez. Dasparzhit ar sivi hag ar chug e gwerennoù. Ouzhpennit ur voullennad dienn-skorn sivi a-raok servijout. Kinklit gant un delienn vent pe vazilig.