28 a viz Mezheven 2004, niv. 19

Evit distreiñ d'ar bajenn degemer

 

 

 

 

 

 

 

 

 

 

 

 

Emgav an Nato en Istanboul

 

 

Hiziv, d'al Lun 28 a viz Mezheven emañ George W. Bush, prezidant ar Stadoù-Unanet, e Turkia. En em vodañ a ra du-se izili an emglev atlantel (Nato) evit komz, dreist-holl diwar-benn arme Irak da zont. Penaos stummañ ar soudarded irakian ? Lod (ar Stadoù-Unanet) a fell dezho e vefent stummet war al lec'h, en Irak, gant an Nato. Frañs hag Alamagn zo a-enep, met stadoù zo eus Europa zo a-du e vefe stummet soudarded Irak gant an Nato, met e broioù all estreget Irak.
Dec'h e oa bet degadoù a viliadoù a dud o vanifestiñ e straedoù Istanboul a-enep da bolitikerezh an Nato. Poblañs Turkia a oa enebet d'ar brezel en Irak, hag a zo nec'het e vefe goulennet digant o Stad skoazellañ arme ar Stadoù-Unanet en Afghanistan hag en Irak.

 

 

 

 

 

 

 

 

N’eo ket reizh mod al labour-douar e Breizh !

 

 

Saotret-spontus eo an dour e Breizh, en ur mod disheñvel hervez al lec’hioù: muioc’h a nitrat e Penn-ar Bed ha muioc’h a "bestisidoù" en Il-ha-Gwilen (kant bro, kant giz...). Perak kement a saotradur ?

Al labour-douar eo ar penn-kaoz : douareier Breizh evit al labour-douar (6 % eus an douareier gouestlet d’al labour-douar e Bro-C’hall) a rank ober gant ar c’haoc’h produet gant kalzik a loened : 20 % eus an deñved, 40 % eus ar yer hag 60 % eus ar moc’h eus Frañs a-bezh zo desavet e Breizh ! Hag o fank ne vez ket puraet en un doare gwall sirius. Da lâret eo e-giz ma vefe 60 milion a dud o chom hag o kac’hat (resped deoc’h !) e Breizh hep na vefe tra ebet evit puraat o dour-skarzh ! Ha ne gomzan ket eus ar pestisidoù skuilhet war ar mais evit magañ tout al loened-se.Ret eo gouzout ivez e vez paeet gant ar Vretoned ur skodenn a-benn disaotrañ an dour (30 % eus o fakturenn-dour) pa vez paeet a-boan un dra bennak gant an desaverien loened....

Kement ha gouzout hiroc’h : http://assoc.wanadoo.fr/erb/ (Eaux et Rivières de Bretagne)

 

 

 

 

 

 

 

 

7vet Saloñs Arz ha Krouerien Breizh

 

 

Abaoe an 19 a viz Mezheven ha betek ar 14 a viz Gouere e vez kinniget, gant Poellgor an Tarv (ezel eus an Emglev Ya d'ar Brezhoneg), un diskouezadeg oberennoù savet gant Bretoned, e Koc'hu Gwerliskin. Lakaet eo bet en a-raoklabour al livour Yvon Labarre hag ar c'hizeller Kito. Gwelet e vo ivez tresadennoù Bruno Le Floc'h, luc'hskeudennoù Arzela Kalvez, bravigoù Bleunwenn Le Goarnig, gwer-livet Anne Toulhoat, hag al labour graet war strink ha maen-greun gant "Strink Breizh e Felger". An diskouezadeg a zoug enor ivez da gKeraluc (priouriezh Kemper) ha da Val Piriou, stilekaerez-giz.
Digor bemdez etre 10e ha 12e, hag etre 2 eur 30 ha 6 eur goude-kreisteiz.
Kement ha gouzout hiroc'h : 02 98 72 81 79.

 

 

 

 

 

 

 

 

EURO 2004 : barrek eo ar Portugal

 

 

Dec'h e oa aet ar maout gant skipailh Portugal ouzh hini Spagn. Bec'h a oa bet warno avat pa'z eus bet da c'hortoz un eurvezh a-raok ma lakfe Nuno Gomez unan e-barzh. Krogadoù a galite zo aet d'ober sizhunvezh kentañ kampionad Europa atav. N'eus skipailh ebet a vefe bet aes an traoù gantañ betek-henn avat. Souezhadennoù all a zlefe bezañ pa n'eus ket a skipailhoù gwan er bloaz-mañ.

 

 

 

 

 

 

 

 

Harry Potter and the Prisoner of Azkaban

 

 

Stadoù-Unanet (2004)
Seveniñ : Alfonso Cuaron

Erru eo poent an distro-skol e Poudlard, ha re laouen eo Harry Potter (Daniel Radcliffe) oc’h en em gavout en-dro gant e vignoned. En argoll emañ sorser e lunedoù avat o vezañ m’eo tec’het Sirius Black (Gary Oldman) kuit eus toull-bac’h Azkaban. Liammoù kevrinus a oa etre ar strobineller-mañ ha tud Harry…
Bourrus a-walc’h e oa bet gwelet da vare Nedeleg div ranndanevell gentañ troioù-kaer tudenn J.K. Rowling. Evit ar pezh a sell ouzh Nedeleg eo c’hwitet er bloaz-mañ, met ret eo lavaret eo dedennusoc’h an istor nevez eget ar re all. Estreget an efedoù ispisial fonnusoc’h, muioc’h a zanvez a zo er senario (traoù a sell ouzh an dadelezh peurgetket). A drugarez da Alfonso Cuaron o vezañ kemeret plas Chris Columbus eo ? Ne oar ket an nen. Gant ma vo ken talvoudus ar rann o tont hag a zo bet sevenet dija gant M. Newell.

Kement ha gouzout hiroc'h : www.harrypotter.com/

 

 

 

 

 

 

 

 

Morrissey – You Are the Quarry

 

 

embannet gant Attack Records

Morrissey n’en doa embannet pladenn ebet abaoe Maladjusted, seizh vloaz zo. D’ar mare-se e oa echu gantañ, hervez ur bern tud. Ma ! Anat eo ne ray ket ar sonerezh a rae pa gane gant The Smiths er bloavezhioù 1980, memes tra eo ret lavaret eo plijus-tre e bladenn nevez. N’eo ket cheñchet e vouezh : ken brav hag a-raok eo. N’en deus kollet nag e vousfent (I Like You) nag e sell pizh war e vro (Irish Blood, English Heart). Ma ’z eo boutin a-walc’h ar sonerezh (rock’n’roll da vat) e santer ez eus bremañ ur gwir strollad a-dreñv dezhañ. E bladenn wellañ abaoe "Vauxhall and I". An eil pladenn a zo dindan stumm un dvd, gant skeudennoù ha video ha komzoù "Irish Blood, English Heart".

www.morrisseymusic.com

 

 

 

 

 

 

 

 

Ar mor, elfenn ar yec’hed

 

 

Ar Vretoned n’o deus ket kalz a hent d’ober evit ober o mad eus ar mor. Bec’h dezhi neuze ! N’eus netra gwelloc’h eget ur bourmenadenn war bord an aod evit naetaat ar skevent ha skarzhañ ar stress kuit. Hervez kont n’eus tamm bakterienn ebet er c’heinvor, ha nebeud-tre anezho war an draezhenn : 10/m3 e-lec’h milionoù/m3 e kêr . Evel-just e c’heller choaz mont da vezañ moumounet en ur greizenn vorvezegiezh er Baol, Sant-Maloù, Rosko, Pornizh pe Benoded, met koustus a-walc’h eo. Neuze, evit a sell ouzh an traoù digoust e c’heller : kerzhet war an traezh an treid en noazh, dorleiñ a ra beg an treid mat-tre. Neuial, kerzhet, lammat en dour ez eus tu d’ober ! Kalz a sportoù plijus marc’had-mat zo ivez : beach-volley, freezbee, mell-droad… Na zisoñjit ket lakaat dourenn-rouzañ (a-walc’h am bo skrivet se !) ha difennit ho taoulagad gant lunedoù heol mat. Kreñvoc’h e vez bannoù an heol war bord ar mor !