21 a viz Mezheven 2004, niv. 18

Evit distreiñ d'ar bajenn degemer

Bonreizh Europa : kendrec’hiñ poblañsoù ar 25

D’ar Gwener 19 a viz Even e oa savet a-du 25 penn-stad Europa gant ur vonreizh kumun a lak sklaer roll Europa hag ar stadoù evit pep danvez, en ur adkemer an testennoù-lezenn etrebroadel niverus, bet sinet abaoe hini Roma.
Kempennet e vo an destenn gant ispisialourien war ar gwir a-raok bezañ sinet en un doare ofisiel en diskar-amzer. Hag a-raok 2 vloaz, e vo ret da bep Stad, dre vot ar parlamant pe ur referendom kinniget d’ar boblañs, kadarnaat anezhi. Tony Blair  en deus embannet dija e vo implijet ar referendom e Breizh-Veur. Er c’hontrol, e Bro Alamagn e vo kemeret an diviz gant ar parlamant. E deroù 2007 e c’hellfe neuze bezañ lakaet e pleustr an destenn-lezenn nevez. Met ma vefe unan o nac’h kadarnaat ar vonreizh ne c’hellfe talvezout evit hini ebet eus Stadoù Europa. Sed aze  perak e c’hell seblantout risklus choaz Tony Blair en ur vro e-lec’h m’eo kresket ar santimant enep-europa hag e trofe Jacques Chirac kentoc’h war-zu ar parlamant gall. Betek an 30 a viz Even e chomo prezidant, an Iwerzhonat Bertie Ahern : poent bras eo neuze d’ar Stadoù dont a-benn d’en em lakaat a-du war anv ur prezidant nevez.

N’eo ket reizh mod al labour-douar e Breizh !

Saotret-spontus eo an dour e Breizh, en ur mod disheñvel hervez al lec’hioù: muioc’h a nitrat e Penn-ar Bed ha muioc’h a "bestisidoù" en Il-ha-Gwilen (kant bro, kant giz...). Perak kement a saotradur ?

Al labour-douar eo ar penn-kaoz : douareier Breizh evit al labour-douar (6 % eus an douareier gouestlet d’al labour-douar e Bro-C’hall) a rank ober gant ar c’haoc’h produet gant kalzik a loened : 20 % eus an deñved, 40 % eus ar yer hag 60 % eus ar moc’h eus Frañs a-bezh zo desavet e Breizh ! Hag o fank ne vez ket puraet en un doare gwall sirius. Da lâret eo e-giz ma vefe 60 milion a dud o chom hag o kac’hat (resped deoc’h !) e Breizh hep na vefe tra ebet evit puraat o dour-skarzh ! Ha ne gomzan ket eus ar pestisidoù skuilhet war ar mais evit magañ tout al loened-se.Ret eo gouzout ivez e vez paeet gant ar Vretoned ur skodenn a-benn disaotrañ an dour (30 % eus o fakturenn-dour) pa vez paeet a-boan un dra bennak gant an desaverien loened....

Kement ha gouzout hiroc’h : http://assoc.wanadoo.fr/erb/ (Eaux et Rivières de Bretagne)

7vet Saloñs Arz ha Krouerien Breizh

Abaoe an 19 a viz Mezheven ha betek ar 14 a viz Gouere e vez kinniget, gant Poellgor an Tarv (ezel eus an Emglev Ya d'ar Brezhoneg), un diskouezadeg oberennoù savet gant Bretoned, e Koc'hu Gwerliskin. Lakaet eo bet en a-raoklabour al livour Yvon Labarre hag ar c'hizeller Kito. Gwelet e vo ivez tresadennoù Bruno Le Floc'h, luc'hskeudennoù Arzela Kalvez, bravigoù Bleunwenn Le Goarnig, gwer-livet Anne Toulhoat, hag al labour graet war strink ha maen-greun gant "Strink Breizh e Felger". An diskouezadeg a zoug enor ivez da gKeraluc (priouriezh Kemper) ha da Val Piriou, stilekaerez-giz.
Digor bemdez etre 10e ha 12e, hag etre 2 eur 30 ha 6 eur goude-kreisteiz.
Kement ha gouzout hiroc'h : 02 98 72 81 79.

EURO 2004 : barrek eo ar Portugal

Dec'h e oa aet ar maout gant skipailh Portugal ouzh hini Spagn. Bec'h a oa bet warno avat pa'z eus bet da c'hortoz un eurvezh a-raok ma lakfe Nuno Gomez unan e-barzh. Krogadoù a galite zo aet d'ober sizhunvezh kentañ kampionad Europa atav. N'eus skipailh ebet a vefe bet aes an traoù gantañ betek-henn avat. Ar re a zlefe mont ar maout ganto er gourfenn zoken a zo bet paket berr : an Dchekiz o deus bet poan ouzh al Latviz, Ar C'hallaoued ouzh ar Groated ha skarzhet ar Spagnoled d'an dro gentañ eta...Souezhadennoù all a zlefe bezañ pa n'eus ket a skipailhoù gwan er bloaz-mañ.

The ladykillers

Stadoù-Unanet (2004) Senario ha seveniñ : Joel hag Ethan Coen

Un den evel m’eo dleet eo an Ao. Goldthwait Higginson Dorr III, Ph.D (Tom Hanks) ; ken seven ma c’hell ur vigodenn gozh evel Mrs Munson (Irma Hall) feurmiñ he c’hav dezhañ nebaon. Un touell eo koulskoude rak n’emañ ket e soñj ar paotr da vodañ aze ur skipailh mignoned da seniñ sonerezh relijiel e gwirionez, ur c’havailhad laeron savet ganto ur steuñv da c’houllonderiñ armel-houarn ur c’hazino bennak ne lavaran ket. Hogen ar vaouez kozh a blanto reuz er raktres-mañ…
Arabat eo keñveriañ re film ar vreudeur Coen ouzh hini Mackendrick savet e 1955. Gwir eo n’eo ket ken fin c’hoari Tom Hanks hag hini Alec Guiness, met ret eo anzav eo disheñvel mat spered ar sevenerien. N’eo ket film gwellañ ar vreudeur Coen kenebeut, met un abadenn farsus a-walc’h da zegemer evel m’emañ memes tra.

Kement ha gouzout hiroc'h : http://ladykillers.movies.go.com/main.html

War un ton laoù, get Yann Gerven

Al levr-mañ a gonta istoer Pierre Goaer, ur paotr, 46 vloaz, é chom e Brest.
Un deiz e wel ur pennad skrid er gelaouenn, kaset get ur vamm-gozh a zo é klask gerioù ur werz. Hag ar werz-se zo bet savet get mamm Pierre Goaier, a-ziar e benn, e-pad ar brezel bed diwezhañ, just -araok bout dilezet ar babig geti ! Advabet eo bet Pierre àr-lerc’h, met klask a ra e vamm abaoe pell. Ha setu, ar paotr da vont en-dro war hentoù Breizh evit gwelet ar vamm-gozh kaset ganti ar pennad skrid. Ha, tamm-ha-tamm, é foetiñ ar vro, Pierre a dostao d’e vamm...
An dra bourraplañ el levr-mañ, zo an doare da skeudenniñ an dud ha dazisplegañ an darempredoù etreze. Met re hir eo un tammig al levr, memestra. Hag-eñ e vo adkavet e vamm get Pierre Goaer ? Ma faota dec’h gouzout an dra se, deoc’h c’hwi da lenn “War un ton laoù”.

Embannet get Skol Vreizh, 7,50 euro an tamm, 200 p

Ti an te e Dinarzh

E 1996 o doa krouet Claudine Renaudineau ha Jean Bernard ur stal gouestlet d’an te. Netra divoutin emezit-c’hwi, war-bouez o doa digoret unan e Dinarzh hag unan all e Lingfield – ur gêriadenn er Sussex – war an dro. Eno e c’heller prenañ ha tañva ur seurt te pe meur a hini e-touez an daou c’hant seurt a vez kinniget. N’eo ket echu. Evit klokaat ar banne te e c’heller saouriñ gwastilli graet ganto : scones, crumbles ha muffins. Prenañ listri mod-saoz a c’hellit ober ivez, hag estreget se c’hoazh, yod-frouezh ha kafe krazet war al lec’h. Barrek-tre war an te eo ar perc’henn, ha mont a ra bep bloaz da vro India evit tañva ar produioù. Kement ha ken bihan m’en deus krouet hennezh e verk hag e sav e veskajoù dezhañ e-unan.

Sac’hadoù te adalek 3,80 euro.

Lindfield ? Co., 48 straed Levasseur 35800 Dinarzh.