26 a viz Ebrel 2004, niv. 10

Kiprenez daouhanteret adarre

Disadorn tremenet e veze votet e Kiprenez evit unaniñ div lodenn an enezenn, an hini durk en Norzh hag an hini gresian er Su. Kinniget e oa bet ur steuñv gant Kofi Annan, sekretour meur Aozadur ar Broadoù Unanet. Turked Kiprenez a oa prest da unaniñ ar vro, 60 % anezho o deus votet a-du. Met war a seblant ne glote ket ar steuñv unaniñ gant ar pezh a felle da Gipreneziz gresian, 75,8 % anezho o votiñ a-enep.

Gant an disoc'h-se, ne c'hello ket an holl Gipreneziz mont en Europa a-benn disadorn, ne vo nemet lodenn ar Su, meret gant ar C'hresianed. Turked an hanternoz zo laouen memestra : gant an disoc'h-se e vo echu gant ur berz ekonomikel a oa a-enep dezho. Embannet o deus meur a wech Gresianed Kiprenez ne oant ket a-enep d'an unaniñ met a-enep d'ar steuñv kinniget hepken.

	OGM : ul lezenn skoemp
	D’an 18 a viz Ebrel e oa bet lakaet da dalvezout en Europa al lezenn nevez diwar-benn penaos heuliañ an OGM ha menegiñ anezhe war an tikedennoù. Ret eo d’ar farderien menegiñ pa vez ur feur 0,9 % OGM da nebeutañ en ur produ. Sellit ouzh an tikedennoù eta da c’houzout petra zo e-barzh ar pezh a brenit. Koulskoude e chom OGM e-barzh hor boued dre ar produioù diwar al loened. Ha pa’z eo ret d’ar boued evit al loened bezañ diouzh al lezenn war an tikedenniñ, n’eo ket gwir tamm ebet evit al laezh, ar c’hig, ar pesked pe an uioù diwar al loened maget gant OGM : n’eo ket ret d’an desaverien embann penaos o deus maget o loened. M’ho peus c’hoant da veveziñ produioù diwar loened hep OGM e c’hellit prenañ produioù diwar al labour-douar bio al label AB gante : gwarantet int bezañ hep OGM. Mod-all e c’hellit tapout al listennad savet gant Greenpeace diwar-benn ar produioù hep OGM pe gant OGM. Kement ha gouzout hiroc’h : www.greenpeace.fr

10 devezh arz a-vremañ e Breizh

Er C’hwec’hkorn e vez aozet an dek devezh evit an arz a-vremañ. Setu al lec’hioù

men e c’heller dizoleiñ traoù e Breizh :
L’imagerie e Lannuon, an ODDC e Sant Brieg, Le Quartier e Kemper, ar FRAC e Kastell-Geron, galiri an TNB e Roazhon, kreizenn àr ar sevenadur e Gwitreg, skol an arzoù-kaer e Brest, ar Passerelle e Brest, ar galiri Colley e Konk-Kerne, kreizenn an arzoù e Douarnenez, tachennad Kergehenneg e Bignan, skol an arzoù-kaer e kêr an Oriant, Galiri Le Lieu e kêr an Oriant, ha muioc’h evit un 20 lec’h el Liger-Atlantel, e Naoned dreist-holl.

Kement ha gouzout hiroc'h : www.culture.gouv.fr/culture/actual/evenemen/art.htm

Tennis

Miz a-raok gwelet tournamant Roland Garros o kregiñ ez eo poent en em c'houlenn gant piv e c'hallfe mont ar maout ar bloaz-mañ.Eus kostez c'hoarierien Frañs ez eo diaes lavaret sklaer e peseurt stad int. Ma c'hounez ar baotred hag ar merc'hed o matchoù e Kib Davis (evit ar baotred) hag er Fed Cup (evit ar merc'hed) e vez disheñvel bras an traoù pa c'hoariont a unan. Ar skouer nevesañ zo bet roet ar sizhun diwezhañ e Monte-Carlo. Diwar an dek gall a oa enskrivet er penn-kentañ ne oa aet hini ebet anezho pelloc'h eget an eizhvet gourfenn. Evit ar pezh a sell ouzh Roland Garros an darn vrasañ eus an dud a soñj e Sebastien Grosjean pe Amélie Mauresmo evit gounit un dra bennak. Gloazet e oant bet o daou n'eus ket pell avat... Souezhus e vefe eta gwelet ur gall o c'hounit an tournamant er bloaz-mañ.

G.S. : Olivier a Gersaozon, hag a zo oc'h ober tro ar bed a zlefe en em gavout e tro Eusa digwener a zeu.

Mell-droad

33vet devezh

Monaco (1añ) 0-1 Naoned (7vet)

Gwengamp (15vet) 1-0 Lens (8vet)

Lyon (2vet) 3-0 Roazhon (12vet)

Grenoble (15vet) 1-1 An Oriant (5vet)

Nîmes (8vet) 3-0 Brest (1añ)

34vet devezh

AC Ajaccio (18vet) – Gwengamp (15vet)

Naoned (7vet) – Lille (11vet)

Roazhon (12vet) – Bastia (13vet)

An Oriant (5vet) – Laval (17vet)

Brest (2vet) – Beauvais (19vet)

Le convoyeur

Frañs – 2004
Senario ha seveniñ : Nicolas Boukhrief

Enfredet eo bet Alexandre Demarre (Albert Dupontel) en un embregerezh treuzdougen arc’hant a vo adprenet a-raok pell gant Amerikaned ar Stadoù-Unanet. Teir gwech eo bet argadet an ambrougerien o labourat eno e korf tri miz. Tamm-ha-tamm e tizolo Alex temz-spered e genlabourerien e-keit ma sav muioc’h-muiañ a c’houlennoù diwar e benn ha diwar-benn ar re all.

Fellout a rae da Nicolas Boukhrief sevel ur film du hag ur film oberour war un dro. Ur film du eo a-dra-sur (a ya da vezañ ur gwir western er fin tout zoken), met ur film oberour n’eo ket ken sur avat. Donoc’h e vefe bet "Le convoyeur" ma vefe bet diskoachet soutiloc’h abegoù an dudenn bennañ d’an arvestourien.

Kement a gouzout muioc’h : http://www.leconvoyeur-lefilm.com/

	An Itron hag an Unkorneg, Tracy Chevalier
	Neb en deus kemeret plijadur o lenn Plac’h he ferlezenn, a vo entanet gant levr nevez Tracy Chevalier. Amañ c’hoazh e splujer, dindan stumm ur romant, e krouidigezh unan eus oberennoù meur an Arz : an heuilhad pallennoù-moger brudet dindan an anv An Itron hag an Unkorneg. Heuliañ a reer buhez luziet arzourien fin ar 15vet kantved bet o sevel an oberenn, Nicolas des Innocents al livour parizian, hag ar familh gwiaderien e Brussel. Istorioù karantez e-leizh ivez evel-just. Leun a ijin eo ar romant-se evel-just pa ne ouezer ket piv en deus savet ar pallennoù-moger. Don eo gouiziegezh ar skrivagnerez avat war ar prantad istorel ha war istor an arz. Kement ha gouzout hiroc’h : http://www.reviewsofbooks.com/lady_and_the_unicorn/ http://www.insecula.com/salle/MS00985.html http://www.tchevalier.com/unicorn/ http://www.musee-moyenage.fr/homes/home_id20860_u1l2.htm

Tajin kig-yar gant figez fresk

Danvez (evit 6 den) : 2 yar 1,5 kg – 1,5 kg figez – 3 c’hlorennad kignen – 3 fenn-ognon – 1 loaiad vihan a ganell, kurkuma, jinjebr – 5 loaiad vras a vel – 4 loaiad vras a eoul olivez – holen – pebr

Dibabit figez darev met fetis. Troc’hit an 2 yar. Dibluskit ar c’hloradennoù kignen hag ar pennoù-ognon, troc’hit anezho a lavnennigoù fin. Gwalc’hit ar figez ha troc’hit anezho e daou. En ur gokelenn, bannit an eoul ha lakait ar c’hig-yar da veleniñ. Tennit an tammoù diwar ar gokelenn.

Lakait ar pennoù-ognon da veleniñ er chug. Adlakait ar c’hig-yar gant ar c’hignen, ar gurkuma, ar jinjebr, an holen. Bannit 30 kantilitrad dour.
Laoskit da boazhañ e-pad 20 mn.. war an tan bihan. Ouzhpennit ar ganell hag ar mel. Laoskit da vitonañ e-pad 5 mn. Diskargit ar figez war ar c’hig-yar. Laoskit da vitonañ e-pad 10 mn. Servijit tomm gant semoul.