Meurzh 15 a viz Meurzh, niv.323
Sizhun 11 - 2011

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@skolanemsav.com

Petra oa keleier Bremaik bloaz zo? Klikit amañ !

Evit distreiñ d'ar bajenn degemer

Gwalleur e Japan,
ar bed a-bezh war evezh

Meur a wech en deus krenet an douar, nepell eus aodoù gevred Japan, abaoe tri devezh. Digwener da gentañ, e-tro 2e45 goude-merenn (eur Japan), gant un nerzh a 8,9 war skeul Richter. Kendalc'het en deus ar c'hren-douar ingal, gant ur grenadenn 6,4 disadorn ha 5,8 dec'h beure. Beuzet ha freuzet eo bet ar vro betek 5 kilometrad en douaroù gant an tsunami bras divent, un eurvezh a-vec'h goude ar grenadenn gentañ. Ar muiañ a zistruj zo bet war tachenn Prefeti Miyagi, enni kêrioù evel Sendaï, hag a zo gevellet gant kêr Roazhon. N'eus tamm keloù ebet gant degadoù a viliadoù a dud, ha meur a vil zo marvet hervez ar c'heleier bet roet gant Stad Japan. Ouzhpenn 215.000 den zo tec'het kuit diouzh o ziez hervez ar Stad. Magañ anken bras a ra Japaniz kenkoulz ha tud all ar bed gant diaesterioù bras div greizenn nukleel Fukushima, hag a zo bet tizhet gant reuz ar c'hren-douar hag an tsunami. An dud a veve e trowardroioù ar c'hreizennoù-se zo bet kaset pelloc'h. Meur a darzhadenn zo bet, hag aezhennoù dislonket en aer neuze. Pevar reaktor ur greizenn zo en ur stad nec'hus. War evezh emañ an holl er bed, gant aon e c'hoarvezfe ur gwalleur nukleel evel e Tchernobyl, 25 bloaz zo.

"Agroekologiezh": un hentenn labour-douar efedus

Emañ Aozadur ar Broadoù Unanet o paouez embann un danevell e-lec'h ma lârer e c'hellfe ar menajoù bihan produiñ an hanter muioc'h oc'h ober gant doareoù an "agroekologiezh". Petra eo an hentenn-se? Diwar un anaoudegezh spis eus perzhioù an douaroù disheñvel, hag un dibab spesadoù a zere, e vez gounezet plant war ur gwiskad plant all (bev pe marv). Ne vez ket "labouret" an douar neuze. Breinadur ar plant kozh an hini eo a vag ar plant all. Diwar-se e c'heller chom hep ober gant louzoù sintez. Espern arc'hant a c'hello al labourerien-douar ober ivez neuze. Hentennoù a zo ivez evit ober gant nebeutoc'h a zour, talañ ouzh al loened noazus, ha krignerezh an douar. E-touez ar poentoù talvoudusañ: ne skuisha ket an teknik-se an douaroù (ar pezh a ra al labour-douar askoridik). Dour hag arc'hant al louzoù a vez esperniet. Kreskiñ a ra ar produerezh (lieskementet dre zaou war an taolioù-arnod bet graet en Indonezia, Viet-Nam, Bengladesh). Gallout a ra bezañ lakaet e pleustr en atantoù bihan. Evit talañ ouzh an naon gant poblañs ar bed o kreskiñ, hep tremen dre ur sistem labour-douar ramzel, saotrus, kreizennet hag a servij an embregerezhioù bras a-raok an dud.

M.M.

Evit gouzout hiroc'h: http://fr.wikipedia.org/

RN137, an hent evit an arz a vremañ (etre Naoned ha Roazhon)

RN137 eo anv an hent a zo etre Roazhon ha Naoned. Anv un diskouezadeg arz a vremañ eo ivez. Emañ o paouez bezañ digoret, evit lakaat war-wel oberennoù arzourien Roazhon ha Naoned. Div gevredigezh, "Zoo Galerie" e Naoned ha "40mcube" e Roazhon, o deus divizet labourat asambles war an arz a vremañ. 12 arzour yaouank hag a zo o vevañ en div gêr vras zo bet choazet evit diskouez o labour. Gant oberennoù liesseurt: livadurioù, tresadennoù, videoioù, skeudennoù pe c’hoazh kizelladurioù hag engravadurioù. Sikour a ra an diskouezadeg-mañ da greñvaat an darempredoù etre Naoned ha Roazhon. "Emañ ar raktres-se en ul lusk kenlabour a glaskomp kas war-raok etre an div gêr, war tachenn ar sevenadur dreist-holl" eme Claire Sacheaud, kargadez a gefridi e Nantes Métropole. E L’Atelier e Naoned e vo kinniget an diskouezadeg da gentañ, etre ar 15 a viz Meurzh hag an 10 a viz Ebrel. Da Roazhon ez aio an oberennoù goude-se e lec’h m'emañ staliet ar gevredigezh 40mcube, etre an 18 a viz Du hag ar 17 a viz Kerzu.

War ar skeudenn: Un chaînon manquant, graet gant Samir Mougas

Evit gouzout hiroc’h: L’Atelier, 1 straed Kastell-Briant e Naoned.
Digor a Veurzh da Sadorn, etre 1e ha 7e ha da Sul etre 10e ha 3e goude-merenn.
Pgz: 02.40.41.90.00.
Lec’hiennoù Internet: www.zoogalerie.fr/rn-137 ha www.40mcube.org

Rugbi : tournamant ar 6 Broad

Italia 22 – 21 Frañs

Bevet Italia! Evit ar wezh kentañ e tournamant "ar c'hwec'h Broad" eo deuet a-benn paotred Italia da c'hounit a-enep ur skipailh "kreñv". Pebezh brud evit ar rubgi italian, gant ar spi e tesacho sportourien nevez war-zu ar sport-mañ. Evit a sell ouzh ar c'hrogad n'eus kazimant netra da lavarout. Dre o c'horf hag o spered, e felle d'an Italianed gounit. Diaes eo lavarout kement-all evit ar C'hallaoued. Traoù en do Marc Lievremont da lavarout d'e c'hoarierien.

Bro Saoz 22 – 16 Skos

War ar paper e seblante bezañ ur valeadenn disoursi evit ar Saozon, a-enep unan eus skipailhoù gwanañ an tournamant. Ar pezh a zo, mil boan o deus bet paotred o Rozenn evit bezañ trec'h. Wilkinson n'en deus ket c'hwitet war an tennoù-kastiz avat, gwell a se evit ar Saozon. Un draig da lavaret diwar-benn an tredeog gall hag a zo aet kuit e-kerzh ar c'hoari: stennet e gof-gar a-greiz-holl!

Kembre 19 – 13 Iwerzhon

Plantet ez eus bet un esae e penn-kentañ-tout ar c'hrogad gant O'Driscoll (2'), ar pezh a ziskoueze mat ar c'hoant c'hoari a oa gant Iwerzhoniz. Kalz re a fazioù o deus graet evit soñjal gounit koulskoude. Tamm-ha-tamm, douget gant o arvesterien, eo distroet Kembreiz, ha gounezet o deus en un doare anat a-walc'h. Ar sizhun a zeu e c'hoariint a-enep Frañs. Ma c'hounezont e c'hellint marteze gounit an tournamant. Mod-all e vo tro ar Saozon.

Au bistro du coin/An Arvest
Frañs - 2010 Seveniñ : Charles Nemes Manu a zo perc’henn war davarn ar c’harter. Dre heg e rank herberc’hiañ tout tud all ar c’harter a zo o prientiñ un arvest evit sikour ar re dido. Ur bern darvoudoù a bep seurt a c’hoarvezo hag a lakaio an arvest en arvar... Nevez zo ho peus bet tro da lenn ur pennad diwar-benn ar film-mañ c’hoazh, abalamour eo bet eilmouezhiet e brezhoneg gant Dizale. Au bistro du coin/An Arvest a gont istor ur c’harter, e-giz ma n’eus ket kement ken, gant koñversanted a bep seurt, kenskoazell etre amezeien hag all. Ur film fentus ha skañv eo, jentil e gemenn. Heñvel eo ouzh un dastumad sketchoù, met plijus eo a drugarez d’ar gomedianed diniver a gemer perzh (Fred Testot, François Berléand, Frédérique Bel pe c’hoazh Eric & Ramzy evit perzhioù bihan). G.L. Barnadennoù filmoù all a c'hellit lenn e blog hor c'henskriverez: http://soubennargeek.wordpress.com Abadennoù brezhoneg Au bistro du coin/An Arvest Embannet e oa bet er sizhun dremenet. E Brest, Gwened, Kemper, Naoned, an Oriant, Roazhon, Sant-Brieg, Sant-Nazer e vo kinniget stumm brezhonek film Au bistro du coin/An Arvest, adalek dimerc'her. Da ziwall a vo avat, rak ne vo ket kinniget ar film alies en e stumm brezhoneg. E Bro-Naoned da skouer, e vo kinniget ur wech. Er sinema Pathé Atlantis e Sant-Ervlan e vo bannet ar film advouezhiet gant skipailh Dizale, a-benn al Lun 21 a viz Meurzh, da 8e15 noz. Un abadenn bemdez a vo kinniget er salioù sinema-mañ: Cinéliberté e Brest, Les Arcades e Kemper, Cinestar e Lannarstêr, Mega CGR e Magoer (e norzh Roazhon), Cinéville e Sant-Nazer. Gellout a ra an dud goulenn aozañ abadennoù ispisial war-eeun digant renerien ar salioù sinema.

Fuckwoman gant Warwick Collins

Abaoe ar bloavezhioù 50 eo brudet harozed ar bannoù-treset evel Batman, Superman, Spider-Man, Iron Man… Rouesoc’h eo niver an dud a oar piv eo Fuckwoman. Evel an harozed all eo rannet he buhez pemdeziek etre daou. Kazetennerez a vicher eo Cyndia Lelague, a-hed an deiz. Gant teñvalijenn an noz e teu da vezañ Fuckwoman, "brec’h armet" ar justis kuzh. Mont a ra da chaseal ar Gour, hec'h enebour. Hemañ a wask ar maouezed, en deus dismegañs outo hag a wel anezho evel tud a eil renk. N'eus den par ebet dezhi evit mestroniañ teknikoù efedusañ ar sportoù-brezel. Un donezon ispisial-tre he deus ouzhpenn-se evit sunañ holl gremm hec’h enebourien: ur nerzh revel hep tamm harz ebet, na skuizhder!

Gant Fuckwoman e c’hellomp tañva fent trenk Warwick Collins. Arabat eo d’al lenner krediñ eo eeun mennozhioù ar skrivagner. N’emañ ket aze evit meuliñ kalon ar maouezed hag isañ anezho d’an emgann. Fellout a ra kentoc’h lakaat an dud da brederiañ war reolennoù hor c’hevredigezh gant ur gontadenn diboell ha dreistordinal.

An divizoù, saourus evel re Woody Allen pe ar Monthy Python Flying Circus, a chomo e-pad pell en eñvor al lennerien!

Tangi Legavre

Fuckwoman gant Warwick Collins. Embannet gant Domaine Etranger 10/18 (2001).

Skrivadeg 2011: a-benn disadorn, 19 a viz Meurzh!
	Ingal bep bloaz e teu bremañ koulz ar Skrivadeg. En taol-mañ e vo an abadenn gentañ d'ar Sadorn 19 a viz Meurzh goude-merenn. En deiz-se e vo aozet ar skrivadegoù lec'hel, un tamm e pep lec'h e Breizh, hag e-maez ar vro zoken. Evit gouzout pelec'h ha penaos e vo aozet en ho korn-bro, kit e darempred gant hoc'h emglev-bro, pe kevredigezh ho pro a ra war-dro kentelioù brezhoneg evit an dud deuet. Bep bloaz ez a ur gevredigezh disheñvel da aozañ ar Gourfenn. En taol-mañ emañ Naoned e penn ar jeu, gant Kentelioù an Noz. Ar re wellañ a vo pedet da genstrivañ adarre evit ar Gourfenn e kêr-benn gozh Breizh, d'ar Sadorn 21 a viz Mae 2011. Berzh bras e ra ar Skrivadeg e Naoned abaoe meur a vloaz bremañ. Ingal e vez ar brasañ niver a dud o kemer perzh er skrivadeg bodet eno. Evit gouzout hiroc'h: goulennit digant ho emglevioù-bro! Bremaik: klask zo war-lerc'h kenskriverien! Plijet oc'h o lenn ar pennadoù embannet a-hed ar bloaz war Bremaik? Sot oc'h gant ar sonerezh, ar sportoù, an arzoù, ar sinema, pe me ’oar-me? Gallout a rit degas ho sell war an danvezioù-se ingal, dre ar brezhoneg, gant Bremaik! Ur skipailh tud a youl vat a sav ar pennadoù bep sizhun abaoe ouzhpenn 6 vloaz, ha bepred emaomp o klask "pluennoù" nevez, evit reiñ un ton liesseurt d'ar gelaouennig (digoust!) war internet, hag e brezhoneg-tout, embannet bep Lun. Evit gouzout hiroch war an doare da vont en-dro, ha penaos kemer perzh e buhez Bremaik, n'eus mann ebet aesoc'h: kasit ur gerig deomp d'ar chomlec'h postel-mañ: bremaik@free.fr! Lennit Bremañ Meurzh 2011! Ekonomiezh Egipt, kembraeg yezh ofisiel, mirdi La Flore en Oriant, Ajañs Sevenadurel Breizh, Ar Marc'h glas gant Riwal Huon, film An Arvest, FC Sankt Pauli e Hamburg, 40 vloaz an Tri Yann... Kaoz zo eus an holl draoù-se hag eus traoù all c'hoazh e niverenn Bremañ Meurzh 2011. An teuliadig a ra anv er miz-mañ eus al labour-douar. Etre berzh ha reuz emañ ar filierenn er vro abaoe pell. 50 vloaz Sica Kastell-Paol zo bet lakaet amañ war wel, hag intrudu nevez evel Bretagne Bio Equité hag Union Bretonne Pie Noir. Kinnig a ra Bremañ ivez div bajennad anvet "Lennomp!". Savet e vezont a-ratozh evit ar re zo o teskiñ brezhoneg gant skipailh Skol An Emsav. M’ho pez plijadurig o lenn Bremaik, plijadur ho po o lenn Bremañ, sur! Bep miz, abaoe 1980, e kinnig kelaouenn Bremañ pennadoù brezhonek a bep seurt, diwar-benn Breizh hag ar bed, kinniget brav, e doare ur magazin. Embannet gant Skol an Emsav (4,50€ an tamm) Koumanant: 50€ evit ur bloaz, 60€ evit an estrenvro, 4€ bep miz dre lamadenn E gwerzh er stalioù-levrioù a ginnig danvez Breizh, pe dre goumanant. Evit gouzout hiroc'h: www.breman.org