Lun 28 a viz C'hwevrer, niv.321
Sizhun 9 - 2011

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@skolanemsav.com

Petra oa keleier Bremaik bloaz zo? Klikit amañ !

Evit distreiñ d'ar bajenn degemer

Sarkozy:
gouarnamant nevez ha devezh e Breizh

E fin miz C’hwevrer 2011 e oa bet divizet gant prezidant gouarnamant Frañs cheñch un nebeud ministred. Goude bezañ roet he dilez gant Michèle Alliot-Marie da-heul he vakañsoù e Tunizia ha tout ar reuz a zo bet, kemeret eo bet he flas gant Alain Juppé evel ministr an Aferioù estren. Cheñchamantoù all a zo bet evel Gérard Longuet, ministr an difenn. N’emañ ket ken Brice Hortefeux er gouarnamant, anvet eo bet kuzulier politikel Nicolas Sarkozy ha deuet eo da vezañ Claude Guéant ministr an diabarzh. Er c’heleier ivez emañ Nicolas Sarkozy rak dont a raio er Mor-Bihan a-benn ar Meurzh 8 a viz Meurzh. Kemer a raio perzh en emvod-meur maered ha prezidanted kumuniezhioù-kumunioù an departamant. Ar gevredigezh renet gant Jacques Le Nay, maer Ploue, zo enni 261 maer ha prezidant. E Josilin e vo graet an emvod. Mont a raio Nicolas Sarkozi da weladenniñ ul labouradeg e-kichen Gwern-Porc'hoed ivez.

Tabut tro-dro d'ar bezhin glas

Nevez zo ez eus bet ur sapre reuz tro-dro da banelloù bruderezh, savet gant France Nature Environnement. Diskouez a raent aodoù goloet gant glazid, gant frazennoù evel "Bonnes vacances" pe "Arrêtez vos salades". Ober a raent anv eus ar saotradurioù, an dañjerioù evit ar yec'hed, ha tamall a raent al labour-douar askoridik. Kaset eo bet ar gevredigezh dirak al lez-varn, ha tabutoù zo savet, etre Jean-Yves an Drian, prezidant Kuzul-rannvro Breizh, ha dilennidi "glas" da skouer . Panelloù all a zo ivez, diwar-benn ar gwenan hag ar boued OGK.

Nebeut war-lerc'h ez eus bet embannet disoc'hoù e enklaskoù gant ar Bodad Skiantel karget gant ar Rannvro da studiañ ar bezhin e Breizh. Mont a ra an disoc'hoù diouzh tu an ekologourien. Diskouez a ra al liamm a zo etre lanv ar glazid hag an doare da verañ al labour-douar. Diskouez a ra ivez eo diefedus an filierennoù evit tennañ splet eus ar metan. Diwar se eo kreñvaet arguzennoù an ekologourien evit goulenn modoù nevez da labourat an douar e Breizh.

M.M.

Evit gouzout hiroc'h:

http://europe-ecologie-regionbretagne.over-blog.com
http://bretagne.europe-ecologie.net/
http://bretagne.europe-ecologie.net/

Diskouezadeg Pierre Moignard

Betek an 12 a viz Meurzh emañ Pierre Moignard e Saozon-Sevigneg evit e ziskouezadeg er palier Pictura (digoust eo).

Krouiñ ha diorren a ra e oberenn a livour abaoe ar bloavezhioù '80 gant ur stil skeudennus. Labouret en doa gant Marc Desgrandchamps ha Gilles Aillaud war un diskouezadeg e kreizenn Pompidou e fin ar bloavezhioù '80. Er bloavezhioù '90 e oa aet kuit d'ar Stadoù-Unanet, war aodoù ar c'hornôg, e Los Angeles. Evit kavout un awen nevez evit e livañ.

Evit e ziskouezadeg evit palier arz modern Geneva, e oa bet awenet gant testenn Shakespeare The Merchant of Venice, sachet ha disachet etre Los Angeles ha Las Vegas. Taolenn bouezusañ an diskouezadeg, Girly Show, zo ispisial un tamm. Gant he ment (550cm×169cm) ha gant ar plac’h noazh e-kreiz an daolenn-se. Ar foñs zo bet livet en ur mod n'eo ket "arzel", lakaomp. Ur c'hinkladur eo (ha n’eo ket bet livet gant Pierre Moignard zoken). Evit ar pin-up, e ra gant skeudenn AR vaouez: ur c'hliched a vez gwelet e pep lec'h er Stadoù-Unanet. Diwar skouer taolenn Edward Hopper, Girlie Show graet e 1941 (e wreg Josephine Hopper e oa e gwirionez), en deus livet Moignard ar pin-up.

Savet en deus an arzour ur film diwar-benn ar vuhez e Las Vegas ivez, anvet Who chooseth me. Notes for the merchant of Vegas. Ur gêr gant milionoù a c’houleier neon. Ur seurt "concrete artifice". Las Vegas zo evitañ un utopia, etre baradoz ha paranoia.

S.B

palier : galerie (d'art)

skeudennus : figuratif

Evit gouzout hiroc’h: www.ville-cesson-sevigne.fr/

Rugbi

Italia 16 – 24 Kembre

N'emañ ket pell paotred Italia eus live ar skipailhoù gwellañ. Diskouezet o deus traoù brav-kenañ a-enep Kembreiz, ha plantet o deus daou esae zoken. Padal e vank c'hoazh traoùigoù evit gounit a-enep skipailhoù "kreñvoc'h". Ma kendalc'hont war an hent-mañ e lakaint skipailhoù diaes e-kerzh kib ar bed e Zeland-Nevez!

Bro-Saoz 17 – 9 Frañs

Ar "Crunch" evel ma vez graet eus ar c'hrogad-se gant ar Saozon! Gwelloc'h eo bet ar Saozon, douget m'int bet gant an dud deuet da arvestiñ ar c'hrogad. Diaes e oa kompren divizoù an tredeog a-wezhioù met n'eo ket evit se eo bet trec'het ar C'hallaoued. Gwelloc'h e oa ar Saozon ha setu tout!

Skos 18 – 21 Iwerzhon

Tri esae a zo bet plantet gant Iwerzhoniz hag hini ebet gant Skosiz, met n'eo ket evit se n'eo ket bet diaes an traoù evit paotred ar melchon. N'eus nemet tri foent a ziforc'h e dibenn ar c'hrogad, ha diskouezet eo bet gant Skosiz ur c'hoant gounit, ur fighting spirit, brav ken ken.

Mell-droad: R1 ha R2

Roazhon 2 – 0 Lens

Daou bal lakaet gant Boukari (14') ha Montaño (70') ha setu Roazhoniz e penn ar R1! Daoust hag-eñ e vo gwelet evit ar wezh kentañ ar skipailh breizhat-mañ kampion Frañs mell-droad? Ne chom nemet trizek krogad ha ma kendalc'h paotred Antonetti war an hent-mañ, piv 'oar!

Valenciennes 0 – 0 An Oriant

Pep skipailh en do bet e hanterenn: an hini gentañ evit an Oriant hag an eil evit Valenciennes. Gwir eo, goude bezañ tapet e eil kartoñs melen gant Coquelin (51') eo bet kalz aesoc'h an traoù evit paotred Valenciennes. Met a-benn ar fin ne vo lakaet pal ebet gant den ebet a-drugarez d'an daou ziwaller-palioù, Penneteau hag Audard evit an Oriant.

Arles-Avignon 1 – 1 Brest

Ur pal a zo bet lakaet a bep tu, Ghilas (36') evit Arles-Avignon ha Touré (50') evit Brest, met n'eus ket bet roet kalzik a draoù da welet war an dachenn. Rampo eo chomet an daou skipailh, ha war tachenn ar c'hoari eo bet kentoc'h nul an disoc'h.

True Grit
Stadoù-Unanet Amerika - 2010 Seveniñ : Ethan & Joel Coen Mattie Ross a zo pevarzek vloaz. Lazhet eo bet he zad gant Tom Chaney, un den techet d’an torfedoù. Pennek eo ar plac’h yaouank ha goprañ a ra ur marshal evit klask war-lerc’h ar muntrer ha dialiñ he zad. LaBoeuf, un Texas Ranger a zo o klask war e lerc’h ivez. Kenemglev ha kevezerezh a vo etrezo bremañ m’emaint war douaroù an Indianed... Remake ur film bet sevenet e 1969 eo True Grit. Ur film efedus o deus savet ar vreudeur Coen gant sikour ur skipailh aktored a-feson. Dispar eo tudenn Mattie, kalonekoc’h ha kreñvoc’h eget ur bern paotred. Fentus ha fromus eo he darempred gant an daou ofiser, sebezet ganti. Ur western klasel o deus savet ivez ha ne vez ket dre ret santet o fent boas met n’eo ket abalamour da se eo fall ar film, pell ac’hann. G.L. Barnadennoù filmoù all a c'hellit lenn e blog hor c'henskriverez: http://soubennargeek.wordpress.com

Gimol Dru Band, ar Ramoneurs, Plantec, TAN e-barzh Tracks

Tro a oa bet da venegiñ er goañv tremen e teufe kelaouennerien an abadenn Tracks (Arte) da eil abadenn Naoned Calling. Skignet e oa bet an abadenn e deroù ar bloaz, d'ar 4 a viz Genver. Klasket he deus ar gelaouennerez Gabrielle Culand gant he film Breizh Sound diskouez ul liamm etre ar strolladoù nevez-mañ (Gimol Dru Band, Plantec, ar Ramoneurs de Menhirs, Trouz an Noz) hag emsav sevenadurel ha politikel ar bloavezhioù '70 e Breizh. Soutiloc'h a c'helle bezañ graet a dra sur, met reiñ a ra ar gaoz da sonerien na vezont ket gwelet gwall alies er skinwel.

Ar strollad Gimol Dru Band a ginnig deoc'h sellet an abadenn (en-dro) war e chadenn YouTube:

Diwar-benn kelaouadenn Tracks :

www.arte.tv/fr/recherche/3617858.html

Div abadenn a vo e Pariz gant Gimol Dri Band a-benn fin ar sizhun:

Gwener 4 a viz Meurzh 2011, 8e noz, e Le Rigoletto. Gant CREWSTYPOP, Casse Gueule, Dj FatKut, 1=0, ivez. www.myspace.com/rigoletto_theatre

Sadorn 5 a viz Meurzh 2011, 7e noz, er Château Albat'art. http://albatart.org/

Evit gouzout hiroc'h diwar-benn GDB: www.myspace.com/gimoldruband

Indignez-vous! eme Stéphane Hessel

D’ar c’houlz ma veve Bro-C’hall dindan veli ar roueed e veze embannet, gwech an amzer, flemmskridoù a dage ar re a oa e penn ar galloud. Pa vezent berr ha taer e veze graet "libelle" anezho.

Lañset eo bet an hengoun-mañ en-dro gant Stéphane Hessel. En e levr Indignez-vous! ez eomp e darempred gant ur c’hozhiad a 93 vloaz n’en deus morse mouget e fulor dirak traoù direizh ar bed. Red e vuhez zo ur romant: desavet e metoù an arzoù, toullbac'het ha jahinet gant an nazied. Goude e dec’hadenn diouzh ar c’hampoù en deus kemeret perzh adarre en oberoù ar brezel kuzh.

Hiziv e fell dezhañ lavaret deomp emañ hêrezh ar "Conseil National de la Résistance" en arvar. Ar surentez sokial, al lezenn nevez evit al leveoù, an diouer a arc’hant postet gant ar Stad evit diorren ar vro… Puilh eo ar skouerioù.

Yuzev eo Stéphane Hessel ha souezhus e c'hell bezañ e harpfe Palestiniz o deus c’hoant da sevel ur vro emren diouzh Israel. Ur wech c’hoazh, emañ ar skrivagner e-penn a-raok an emgann evit goulenn groñs ur bed reishoc’h.

Bezañ yaouank zo un temz-spered.

Tangi Legavre

Indignez-vous! gant Stéphane Hessel. Embannet gant Editions Indigènes (2010).

"Baleadenn": 1añ saloñs ar bale er Vourc'h-Wenn
	A-benn disadorn ha disul, d'ar 5 ha 6 a viz Meurzh, e vo kinniget saloñs "Baleadenn" er Vourc'h-Wenn, evit ar wech kentañ. Reiñ a raio da welet ha da anavezout glad puilh ar c'horn-bro a-dreuz gwenojennoù, anavezet mat pe get. Standoù, prezegennoù, abadennoù buheziñ ha troioù-bale a vo kinniget e-kerzh ar saloñs nevez-mañ neuze. E penn ar jeu emañ ar gevredigezh Brezhoneg Bemdez. Evit gellout sevel an degouezh-mañ, ez eus div gevredigezh all o reiñ harp: An Ode Wenn (kevredigezh tud skolajidi Diwan Gwiseni) ha Skolarn (tud skolajidi Diwan ar Releg-Kerhuon). Ar skrivagner Herve Beleg a vo paeron ar saloñs hag ar baleadennoù d'ober e bro Breselien a vo lakaet war wel. Evit gouzout hiroc'h: www.baleadenn.org Deiziataer 2011 Adkavet e vo er bloaz-mañ ar stumm klasel a blij d'an dud: 17cm uhelder ha 9cm ledander, gant ar skrid a-led. En ur golo kartoñs e liv e vo kavet an deiziataer, en taol-mañ, pevar liv penn-da-benn. Kantadoù a chomlec'hioù a gaver ivez er fin, gant roll pouezusañ aozadurioù sevenadurel ar vro (kelenn, embann, mediaoù...). Nevez er bloaz-mañ: "Ar brezhoneg war ar Genrouedad" renabl al lec'hiennoù pouezusañ e brezhoneg war ar Genrouedad renket e 6 rumm. E gwerzh emañ Deiziataer 2011, 10€ an tamm. Gellout a reer gourc'hemenn anezhañ dre ar Post ivez evel-just. Dont e darempred gant Skol an Emsav (12€ an tamm gant ar mizoù-kas). Evit gouzout hiroc'h: Skol an Emsav, 25 straed Pierre Martin, 35000 Roazhon. Pgz: 02.99.38.75.83. Plr 02.99.63.82.28. Postel: sae.bzh@wanadoo.fr Internet: www.skolanemsav.com Bremaik: klask zo war-lerc'h kenskriverien! Plijet oc'h o lenn ar pennadoù embannet a-hed ar bloaz war Bremaik? Sot oc'h gant ar sonerezh, ar sportoù, an arzoù, ar sinema, pe me ’oar-me? Gallout a rit degas ho sell war an danvezioù-se ingal, dre ar brezhoneg, gant Bremaik! Ur skipailh tud a youl vat a sav ar pennadoù bep sizhun abaoe ouzhpenn 6 vloaz, ha bepred emaomp o klask "pluennoù" nevez, evit reiñ un ton liesseurt d'ar gelaouennig (digoust!) war internet, hag e brezhoneg-tout, embannet bep Lun. Evit gouzout hiroch war an doare da vont en-dro, ha penaos kemer perzh e buhez Bremaik, n'eus mann ebet aesoc'h: kasit ur gerig deomp d'ar chomlec'h postel-mañ: bremaik@free.fr! Lennit Bremañ C'hwevrer 2011! Dispac'h ar Jasmin e Tunizia, Atlas broadoù distad Europa, ar merk "Bretagne", reuz kraou-moc'h Trabrivan, afer ar vag La Boudeuse, distro Stourm ar Brezhoneg, Prizioù 2011 France 3, Naoned kêr-benn ar babyfoot, ar c'hoari "Roue Breizh"... Kaoz zo eus an holl draoù-se hag eus traoù all c'hoazh e niverenn Bremañ C'hwevrer 2011. An teuliadig a ra anv er miz-mañ eus an dilennadegoù da zont evit ar guzulierien-departamant. An dro diwezhañ e vo da votiñ er mod ma vo graet a-benn an 20 hag ar 27 a viz Meurzh. Daou zilennad o vont da zilezel emvodoù ar c'huzulioù-departamant a ro o soñj: Andre ar Gag (Penn-ar-Bed) ha Patrick Mareschal (al Liger-Atlantel)... Kinnig a ra ivez Bremañ div bajennad anvet "Lennomp!". Savet e vezont a-ratozh evit ar re zo o teskiñ brezhoneg gant skipailh Skol An Emsav. M’ho pez plijadurig o lenn Bremaik, plijadur ho po o lenn Bremañ, sur! Bep miz, abaoe 1980, e kinnig kelaouenn Bremañ pennadoù brezhonek a bep seurt, diwar-benn Breizh hag ar bed, kinniget brav, e doare ur magazin. Embannet gant Skol an Emsav (4,50€ an tamm) Koumanant: 50€ evit ur bloaz, 60€ evit an estrenvro, 4€ bep miz dre lamadenn E gwerzh er stalioù-levrioù a ginnig danvez Breizh, pe dre goumanant. Evit gouzout hiroc'h: www.breman.org