25 a viz Here 2004, niv. 29

Evit distreiñ d'ar bajenn degemer

Gouel al Levrioù e Breizh e Karaez

15vet Gouel al Levrioù ha 18vet Saloñs Romantourien Breizh a vo aozet e Karaez an dibenn-sizhun-mañ, d'ar Gwener 29, Sadorn 30 ha Sul 31 a viz Here.

Gant ar gevredigezh Egin e vez aozet ar Gouel, e savadur Leurenn Glenmor. Etre 10 000 ha 15 000 den a zeu d'ar Gouel-se bep bloaz, evit gwelet standoù 70 embanner eus ar vro, hag an 50 roumantour ha 250 skrivagner a vez o sinañ o levrioù e-kerzh ar Gouel. Anat eo e kaver eno an holl embannerien pe dost, a ra gant ar brezhoneg.
Kalz a brizioù a vo roet er bloaz-mañ : priz Langleiz, priz Kêr Karaez, priz Barzhoniezh Glenmor, priz Liseidi Diwan ha priz ar Yaouankiz.

OGK : d’ober petra ?

Muioc’h-mui e vez gounezet OGK er c’hevandir amerikan (ar Stadoù Unanet, Arc'hantina, Kanada, Brazil) hag e Bro-Sina. Soja, maiz, kotoñs ha kolza eo a vez gounezet ar muiañ. N’eo ket evit talañ ouzh ar gernez war hon douar patatez ez eus bet ijinet seurt plant ; evit lakaat al labourerien-douar da sujañ d’ar broduerien OGK ne lâran ket.
Embregerezhioù evel Monsanto (o deus ijinet an “agent orange” en deus distrujet Vietnam) pe Novartis a glask lakaat o c’hrabanoù war marc’had an had, gwerzhañ louzeier-amprevaned ha lakaat brevedoù war ar bev evit brasañ gounid o c’hevrannerien. Da skouer, e Kanada e oa bet kaset dirak al lez-varn gant Monsanto labourerien-douar a oa bet kontammet o farkeier gant OGK o amezeien war zigarez e implijent had brevedoù warne hep kaout aotre !
Ma n’emañ ket Europa dindan o beli kement-se, eo ret chom war evezh koulskoude, ken kreñv eo ar gwask.

Kement ha goût hiroc’h : www.infogm.org

Arzoù Mec'hiko

Gouel filmoù sinema Douarnenez an hañv o tont a vo diwar an Chicanos : ar Vec'hikaned oc'h harluiñ d'ar Stadoù-Unanet. Da zeskiñ muioc'h diwar arz pobloù ar vro-se, arz modern hag arz a vremañ, e c'hellit mont da welet diskouezadegoù amañ hag ahont.

"Mec'hiko-Europa, mont-dont / 1910-1960" un diskouezadeg e Lille, kêrbenn europat ar sevenadur betek miz Genver 2005. Kregiñ a ra an diskouezadeg gant 1910 : ar bloavezh ma tarzh an dispac'h enno. Ur 74 arzour bennak a vo tu da welet : arzourien muralist e-giz Diego Rivera, Siqueiros, pe arzourien all Montenegro, Frida Kahlo. Arzourien hollvrudet, lod eus outo troet o arz war ar stourm.

Arzourien a vremañ Mec'hiko a zo tu gwelet en Ensavadur Mec'hiko : tud e-giz Guillermo Santamarina, Marco Arce, Eduardo Cervantes, Jésus Lugo h.a.

E Pariz, betek an 30 a viz Here : 01 44 61 84 44.

Judo

An dibenn-sizhun-mañ e oa e Pariz (er Stad Pierre de Coubertin) kampionad Europa ar judo dre skipailh. Goude ar C’hoarioù Olimpek diwezhañ c’hwitet, c’hoant bras a oa neuze gant tout ar c’hourenerien c’hall da cheñch penn d’ar vazh. Hag graet eo bet.... Eus kostez ar merc’hed da gentañ, gant ur plas kentañ gounezet war skipailh Breizh-Veur (6 trec’h da 1). Disoc’h Aten a oa neuze dija hanter disoñjet. Met se a oa hep kontañ gant ar baotred hag o deus echuet int ivez d’ar plas kentañ, goude ur gourfenn startoc’h a-enep Italia (4 trec’h da 3). Un dibenn-sizhun brav ha pouezus neuze evit ar judo gall hag en doa ezhomm adkavout hent an trec’h.

Mell-droad

11 vet devezh (R1)
Roazhon (15vet) 3-1 Metz (10vet)
Caen (14vet) 2–1 Naoned (7vet)

13vet devezh (R2)
Sedan (4e) 0-0 Brest (2vet)
An Oriant (20vet) 3–1 Créteil (18vet)
Gwengamp (19vet) – Amiens (6vet)

12vet devezh (R1)
AC Aiacciu (18vet) – Naoned (7vet)
Roazhon (11vet) – Caen (10vet)

13vet devezh (R2)
Brest (2vet) – Chateauroux (12vet)
Reims (10vet) – An Oriant (17vet)
Clermont Foot (15vet) – Gwengamp (20vet)

Arsène Lupin

Frañs - 2004
Senario ha seveniñ : Jean-Paul Salomé

Kontet e vo deoc’h yaouankiz Arsène Lupin ha penaos e oa en em gavet gant ar gontez Cagliostro, ul laerez strobinellus hag a yelo da vezañ mentor ha mestrez ar paotr war un dro. O klask war-lerc’h teñzor rouaned Bro-Frañs o do afer an daou-se ouzh ur genvreuriezh c’halloudus.
Danvez filmoù a-feson a zo e-barzh levrioù Maurice Leblanc, anavezet mat eo hag ur rummad a-zoare a oa bet savet gant Georges Descrières er bloavezhioù 60. Treuzlennet en doa Salomé La Contesse de Cagliostro ha diwezh L’aiguille creuse a-benn sevel e film. Splann eo n’en deus komprenet mann ebet da zibarded Arsène Lupin avat, an holl elfennoù a ra talvoudegezh an dudenn a zo diank er film-mañ. N’eus "Gentleman cambrioleur" ebet war ar skramm, ur poufer a zorn-skrap (pickpocket) ne lavaran ket. Ha n’o deus ket kavet ar senarioourien o gwalc’h a awen en oberenn Maurice Leblanc, aet int da sunañ "Star Wars" war ar marc’had. Boas eo Salomé da sevel ur bern teil diwar un danvez deus ar re wellañ : savet en doa ur "Belphégor" mezhus e 2000 c’hoazh.
Petra a dalv "Arsène Lupin" neuze? Ur bramm kog a c’heller ober heptañ e gwirionez.

Kement ha gouzout muioc'h : http://www.club-internet.fr/arsenelupin/

Ellen Allien – My Parade /DJ Mix

Embannet gant Bpitch Control

Ar bloaz tremenet e oa deuet er-maez ur bladenn sonerezh elektronek dispar : Berlinette, gant Ellen Allien. Distreiñ a ra-hi gant ur bladenn nevez : diwar an 13 kanaouenn n’eus nemet 2 savet ganti, ar peurrest a zo sonerezh elektronek alaman (Modeslektor, Apparat) pe saoz (Plaid). E gwirionez e c’haller lakaat ar bladenn da vont eus ar penn kentañ betek ar fin : pep tra a zo bet mesket ganti, n’eus troc’h ebet, evel ma vefe ur ganaouenn hir gant meur a lodenn. Un dra voutin a zo d’an holl ganaouennoù : sonerezh elektronek bihanañ eo, gant sonioù eeun o tont a-frapadoù.

www.ellenallien.de
www.bpitchcontrol.de

Te gant bent mod Maroko

Evit 4-5 gwerennad
Danvez : te glas hep blaz ispisial, 1 boked bent fresk, 10-15 tamm sukr

Lakait dour da dommañ, bannit ur werennadig dour tomm-berv war 2 loaiad a de glas. Goude ur vunutenn, skarzhit an dour, met mirit an te (evit skarzhañ c’hwervded an te), ha bannit ar peurrest eus an dour (gwelloc’h eo kaout ur pod-te bihan a-walc’h, gant ur sil en e veg eo gwelloc’h c’hoazh). Ouzhpennit ar bent fresk, ha beuzit an deliennoù en dour diouzhtu (ma chomont war-c’horre e tapint ur blaz krazet, c’hwerv un tamm), hag ouzhpennit an tammoù sukr.
Evit meskañ, ne vez ket graet gant ul loa. Tapit ur werenn, ha skuilhit an te eus ar pod-te e-barzh ar werenn hag eus ar werenn e-barzh ar pod-te, meur a wezh.
Mod-se e vez mesket mat. Diskennit an te er gwerennoù en ur zerc’hel ar pod-te uhel a-walc'h, evit kaout spoum…